Software llibre

El software llibre, como lu define la Free Software Foundation, ye software que se pue emplegar, copiar, estudiar, camudar y redistribuir sin restricciones. Esa llibertá ye central al conceutu de «software llibre»; poro, lo contrario de software llibre ye software privativu, y non el software que se vende pa ganar perres, como'l software comercial. El software llibre tamién se llama libre software (dizse así n'inglés tomando la pallabra libre prestada del español), FLOSS, o software de códigu abiertu (por embargu, la espresión cabera nun diz esautamente lo mesmo).

Pa estremar el software llibre del software de baldre (n'inglés les dos coses dícense igual), Richard Stallman, fundador del movimientu del software llibre, dixo que'l software llibre ye una cuestión de llibertá, non de perres (esta esplicación necesítase n'inglés, llingua na que, como se dixo más arriba, la pallabra free quier dicir igualmente de baldre, gratis y llibre, y mucha xente tracamundia'l significáu). Quier dicir que los usuarios del software tienen la llibertá de cooperar y de controlar el software qu'empleguen.

Munchu software llibre distribúyese de baldre n'Internet, pero nun ye una condición necesaria; pue vendese.